பொது மருத்துவம்:வாய்ப்புண் ஏற்பட பல காரணங்கள் உள்ளன. முக்கியமாக, மலச்சிக்கல், பித்த அஜீரணம், உடற்சூடு, வைட்டமின் சி, பி12, வைட்டமின் சத்து போன்ற ஊட்டச்சத்துக் குறைபாடுகள், நோய் எதிர்ப்புச் சக்தி குறைவு, வீரியம் மிக்க மருந்துகள் மற்றும் மாத்திரைகளை உட்கொள்ளுதல், உணவு ஒவ்வாமை போன்றவை காரணமாக அமைகின்றன.
காரணங்கள்…
புகைபிடிப்பவர்கள், மது அருந்துபவர்கள், வெற்றிலை, புகையிலை, பான் மசாலா போடுபவர்கள், சர்க்கரை நோயாளிகள் ஆகியோருக்கு வரலாம். இவை தவிர, வாயைச் சுகாதரமாக வைத்துக்கொள்ளாதவர்கள், குடல் மற்றும் இரைப்பையில் புண் உள்ளவர்கள், மனஅழுத்தம், ஆக்ரோஷ குணமுடையவர்களுக்கு மீண்டும் மீண்டும் வரும் வாய்ப்புகள் அதிகம். பல் துலக்கும்போது பிரஷ்ஷால் இடித்துக்கொண்டால்கூட இது ஏற்படலாம். அதேபோல, டீ அல்லது காபியை அதிகச் சூட்டோடு குடித்தால்கூட வாய்ப்புண் வருவதுண்டு.
உணவுகள்…
வாய்ப்புண் இருக்கும்போது, பச்சைமிளகாய், புளிப்புச் சுவையுடைய உணவுகளைச் சாப்பிடுவதைத் தவிர்க்க வேண்டும். இனிப்பு, கசப்பு, துவர்ப்பு சுவைகொண்ட உணவுகளை அதிகம் சேர்த்துக்கொள்ள வேண்டும். வெல்லம், பாசிப் பயறு சேர்த்துக் கஞ்சியாக குடிக்கலாம். கீரை, பசும்பால், தேங்காய்ப்பால், பீர்க்கங்காய், புடலங்காய், நெல்லிக்காய் போன்றவற்றை உணவில் சேர்த்துக்கொள்ளலாம். வெள்ளைப் பூசணிக்காய் அல்லது அகத்திக்கீரையைச் சமைத்து சாப்பிட்டால், உடனடி நிவாரணம் கிடைக்கும். முருங்கைக்கீரை மற்றும் பூ, சிறுகீரையை சமைத்துச் சாப்பிடலாம். கொய்யா இலைகளை மென்று துப்பலாம். நாட்டு மருந்துக் கடைகளில் கிடைக்கும் அதிமதுரப் பொடி அல்லது கடுக்காய் பொடியை வாங்கி, அதைத் தேனில் குழைத்துச் சாப்பிடலாம்.
வாய் கொப்பளித்தல்
வாய்ப்புண் உள்ள இடத்தில் சுத்தமான தேனைத் தடவலாம். ஆர்கானிக் ரோஜாப்பூ இதழ்கள் அல்லது கொட்டைப்பாக்கை தண்ணீரில் போட்டு கொதிக்கவைத்து, வாய்கொப்பளிக்க வேண்டும். தேங்காய்ப்பாலை குடிக்கலாம்; அதைக்கொண்டு வாய்க்கொப்பளிக்கவும் செய்யலாம்.
செய்யவேண்டியவை…
உணவு ஒவ்வாமை, மருந்து ஒவ்வாமை இருந்தால் தொடர்புடைய உணவு, மருந்தைத் தவிர்க்க வேண்டும். மதுப் பழக்கத்தைக் கைவிட வேண்டும். புகைபிடிக்கக் கூடாது. வெற்றிலை, புகையிலை, பான் மசாலா போடக் கூடாது. சர்க்கரை நோயாளிகள் நோயைக் கட்டுக்குள் வைத்திருக்க வேண்டும். உடலில் நோய் எதிர்ப்புச் சக்தி குறையாமல் பாதுகாக்க, சரிவிகித உணவைச் சாப்பிடவேண்டும். அதிகமாகக் கவலைப்பட்டாலும் வாய்ப்புண் வரும் என்பதால், எப்போதும் மன மகிழச்சியோடு இருக்கவேண்டியது அவசியம்.
கவனம்:
பாக்டீரியா, வைரஸ் போன்ற கிருமிகளின் தாக்குதல் காரணமாக வரும் சின்னம்மை, தட்டம்மை, எய்ட்ஸ் போன்ற நோய்கள் ஏற்படும்போது வாயில் புண் ஏற்படும். எனவே, வாய்ப்புண் வெகு நாள்களுக்குத் தொடர்ந்தாலோ, குறுகியகால இடைவெளியில் திரும்பத் திரும்ப வந்தாலோ மருத்துவர்களின் ஆலோனையைப் பெறுவது சிறந்தது.
